Special Display
I Placed My Name There: The Great Inscription of Tukulti-Ninurta I, King of Assyria

About | Transliteration | Translation | Bibliography | Credits


Transliteration

Yigal Bloch, The Hebrew University of Jerusalem

After Görg 1989, corrected according to Streck 2007: 150-152   

I
1) mgiš TUKUL-ti-d Nin-urta MAN KIŠ
2) MAN dan-nu MAN KUR Aš-šur ni-šit
3) Aš-šur ŠID Aš-šur SIPA na-a-du
4) mi-gir dA-nim ù dBAD
5) šá Aš-šur ù DINGIR.MEŠ GAL.MEŠ
6) MU-šú ki-níš ib-bu-ú
7) kib-rat 4 ana šá-pa-ri i-di-nu-šú
8) na-a-du šá-kin-ki DINGIR.MEŠ
9) mu-ṭí-ib ŠÀ Aš-šur
10) šá al-ka-ka-tu-šú UGU DINGIR.MEŠ
11) šá AN KI i-ṭí-ba-ma
12) me-tel-lu-tu na-ad-na-tu-šú
13) mu-šá-ter ana ŠU.NÍGIN DINGIR.MEŠ zi-bi
14) ka-ia-na mu-ul-tas-hír
15) KUR.KUR KÚR.MEŠ e-liš KI.TA
16) MAN dan-nu le-ú MURUB4
17) šá kib-rat 4 ar-ki d Šá-maš
18) ir-te-ú ana-ku
19) A d SILIM.MA-MAŠ MAN KUR Aš-šur
20) A d10-ÉRIN.TÁH MAN KURAš-šur-ma
21) e-nu-ma Aš-šur EN ana pa-la-hi-šú
22) ki-níš ú-ta-ni-ma
23) ana SIPA-ti-ia gišGIDRU i-di-na  
24) ana NA.GAD-ti-ia ši-pi-ra ú-ṣi-pa
25) ana ša-ga-šú gi-ri-ia
26) šuk-nu-uš la-di-ri-ia
27) me-tel-lu-te iš-ru-ka
28) a-ge be-lu-ti e-pír-a-ni
29) ina GÚ KUR.KUR GÌRú-kín
30) rap-šá-ti ṣa-al-mat qa-qa-di
31) ki-ma bu-li lu ar-te-ʾi
32) de-en me-šá-ri ú-šá-hi-za-ni
33) ki-ma ana ŠU.NÍGIN dA-nun-na-ki
34) šá-ah-ta!-ku!-ma! DINGIR.MEŠ i-du-ú
35) kúl-la-<at> gi-ri-ia!
36) ana GÌR-ia ú-še-ek-niš
37) e-nu-ma ÉRIN.MEŠ Ú-qu-ma-na-iu-ú

II
1) šá iš-tu ul-la-a MAN.MEŠ mah-ru-ti
2) ab-be-ia kúl-la-at gi-mir-ti KUR.KUR
3) la ik-nu-šú-ma
4)
mi-še-eʾ-ti kib-rat 4
5) ú-ka-mu ina u4-me-šú-ma
6) ina e-mu-qe dan-na-ti
7) ša Aš-šur EN-ia
8) ina gišTUKUL-ti šá DINGIR.MEŠ GAL.MEŠ
9) pe-tu-ú gišTUKUL.MEŠ-ia
10) a-li-ku-ut im-ni-ia
11) ar-hi pa-áš-qu-ti ki-ṣir hur-šá-ni
12) dan-nu-ti at-tal-la-ku-ma
13) ina kib-rat 4 ma-hi-ra
14) la i-šu-ú ina šur-<ru> MAN-ti-ia
15) ana KUR Ú-qu-me-ni a-lik
16) si-hír-ti KUR Qu-ti-i DAGAL-ti
17) ki-ma DU6 a-bu-bi ás-hu-up
18) ÉRIN.MEŠ-šú-nu si-hír a-šàm-šá-ti
19) lu ú-šal-me
20) ina u4-me-šu-ma i-na áš-ri
21) nam-ra-ṣi pu-šuq hur-šá-ni
22) ana IGIÉRIN.MEŠ-ia in-ne-ni-ma
23) ana MURUB4 ù ta-ha-zi
24) dáp-níš iz-zi-zu-ni
25) ana Aš-šur ù DINGIR.MEŠ GAL.MEŠ
26) EN.MEŠ-ia at-kal-ma
27) it-ti-šu-nu am-da-haṣ
28) a-bi-ik-ta-šu-nu aš-kun
29) šal-ma-ti-šu-nu hur-ri muš-pa-li
30) šá KUR-i lu-mel-li
31) i-ta-at KÁ.GAL-šu-nu
32) šal-ma-su-nu ana gu-ru-na-ti  
33) lu ú-še-pi-ik
34) URU.URU-šu-nu a-pu-ul
35) aq-qur a-na DU6 ù kar-me ú-ter
36)KUR Qu-ti-i DAGAL-ti a-bél

III
1)
i-na hu-ud ŠÀ ù me-tel-lu-ti       
2)
UGU-šu-­nu lu at-ta-zi-iz
3)mA-bu-le-e MAN KUR Ú-qu-me-ni
4) gu-ni ma-li-ki-šú
5) qa-ti ik-šud
6) šal-la-su-nu nam-kur-šu-nu aš-lu-la
7) a-na URU-ia Aš-šur lu-bi-la
8) ni-iš Aš-šur ù DINGIR.MEŠ GAL.MEŠ
9) šá AN KI lu-tam­-me-šu-nu-ti
10) ni-ir be-lu-ti-ia dan-na
11) ina GÚ-šu-nu ú-kín
12) a-na KUR-šu-nu ú-me-šìr-šu-nu-ti
13) šap-ṣu-ti-šu-nu ana GÌR-ia
14) ú-šék-­níš
15) ù tup-ši-ka e-mì-id
16)MU-šàm-ma GÚ.UN-su-nu DUGUD
17) ina URU Aš-šur ina tàk-né-e
18) lu am-da-har
19) KUR Qu-ti-i né-su-ti
20) šà ar-ha-tu-šu-nu šu-up-šu-­qa-ma
21) a-na me-te-eq ÉRIN.MEŠ-ia
22) ul na-ṭu-ú
23) a-na uz-zi MURUB4-ia
24) iš-hu-tu-ma
25)a-na GÌR-ia ik-­nu-šú
26) GÚ.UN ù ma-da-ta
27)a-na u4-um ṣa-ti UGU-šu-nu aš-kun
28) ina u4-me-šu-ma a-na KUR Šar-ni-da
29)KUR Me-eh-ri lu a-lik
30) ina Á-at ÉRIN.MEŠ-at Qu-ti-i
31) šá Aš-šur ù DINGIR.MEŠ GAL.MEŠ
32) a-na is-qi-ia iš-ru-ku
33) GU.ŠUR KUR Me-eh-ri dan-nu-ti
34) lu ak-ki-is ana URU-ia Aš-šur
35) lu-bi-la É.GAL be-lu-ti-ia
36) šá <a>-ra-mu ina GU.ŠURMe-eh-ri
37) šá-tu-nu lu ú-kín

IV
1)
i-na MU-ma ši-a-ti 4 URU.DIDLI šap-ṣu-ti
2) šá KUR Kat-mu-hi
3) ma-haz be-lu-ti-šú dan-nu-ti
4) šá i-na su-lu-me-e ù sa-ra-ar-te
5) UN.MEŠ-ia ú-ka-mu
6) mi-še-eʾ-ta ana KUR-ia na-du-ú
7) i-na ma-lu-ti u4-me lu ak-šud
8) eš-re-su-nu ki-ma ri-be lu-ri-ib
9) šal-la-su-nu nam-<kur>-šú-nu aš-lu-la
10) ana URU-ia Aš-šur ub-la
11) KUR Šu-ba-rí-i ka-la-šá
12) si-hír-ti Ka-ši-ia-ri
13) a-di KUR Al-zi šá i-na IGI ana tar-ṣi
14) BALA mdSILIM.MA-MAŠ MAN.KIŠ a-bi-ia
15) ib-bal-ki-tu-ma ta-mar-ta-šú
16) ik-lu-ú pa-a 1-en
17) mi-it-ha-ri-iš iš-šá-ak-nu
18) ana Aš-šur ù DINGIR.MEŠ GAL.MEŠ
19) EN.MEŠ-ia qa-ti aš-ši
20) ana KUR Ka-ši-ia-ri e-li KUR Šu-ba-ri-i
21) KUR Al-zi MAN.MEŠ re-ṣi-šú-nu
22) i-na rap-pi lu-la-iṭ ma-ha-za GAL-a
23) šá KUR Pu-ru-lúm-zi ak-šud
24) bal-ṭu-su-nu i-na IZI aq-lu
25) ši-ta-at ÉRIN.MEŠ-šu-nu
26) ana šal-la-ti lu am-nu
27) 4 URU be-lu-ti-šú dan-nu-ti
28) šá mEh-li-Te-šub MAN KUR Al-zi
29) 6 URU.DIDLI šap-ṣu-ti
30) šá KUR A-ma-da-ni aq-lu
31) šal-la-su-nu nam-kur-šú-nu aš-lu-la
32) ana URU-ia Aš-šur ub-la
33) mEh-li-dTe-šub MAN KUR Al-zi
34) ana i-di pu-luh-ti-ia
35) 6-hu-ut-ma ÉRIN.MEŠ É.GAL-lì-šú
36) ù DUMU.MEŠ il-qe
37) si-hír-ti KUR-šú ú-me-šìr

V
1)
ana pa-aṭ Na-i-ri ana KUR la i-du-ú
2) šá-la-liš lu i-ba-ʾa
3) ši-ta-at ÉRIN.MEŠ-šú
4) šá i-na ŠÀ tam-ha-ri i-pár-ši-du
5) šu-mur ta-ha-zi-ia
6) e-tar-ma ana KUR-i e-be-ru-ti
7) ana e-ṭé-er nap-šá-ti-šu-nu
8) lu i-nu-qu 3 šu-ši URU.DIDLI-šú
9) a-pu-ul aq-qur ina IZI aq-lu
10) ana DU6 ù kar-me ú-ter
11) KUR Al-zi KUR A-ma-da-ni
12) KUR Ni-ha-ni KUR A-la-ia
13) KUR Te-pur13-zi KUR Pu-ru-lúm­-zi
14) mi-iṣ-ra-te-šu-nu
15) ana ŠÀ KUR-ia lu ú-te-ra
16) li-ṭí-šú-nu áṣ-bat ana GÌR-ia ú-šék-[niš]
17) ù tup-ši-ka e-mì-id
18) ina be-ri-it URU Šá-si-lam
19) ù URU Maš-haz-MAN
20) e-bir Za-be šu-pa-li-i
21) iš-tu KUR-i Zu-qu-uš-ki
22) ù KUR-i La-la-ar
23) ši-di KUR Qu-ti-i DAGAL-ti
24) si-hír-ti Lu-lu-mi-i Pap-hi-i
25) a-di Kat-mu-hi KUR Šu-ba-ri-i ka-la-šá
26) si-hír KUR Ka-ši-ia-ri
27) a-di ZAG Na-i-ri ù Má-kan
28) ši-di Pu-rat-te
29) mi-iṣ-ru
30) ù ku-du-ur-ru
31) šá Aš-šur ù DINGIR.MEŠ GAL.MEŠ
32) ana is-qi-ia iš-ru-ku
33) pa-a 1-en kúl-la-at
34) na-ki-<ri>-ia aš-ku-un
35) NUN ma-hír ta-ti-šu-nu
36) SIPA pa-qi-su-nu
37) UTUL mul-te-šìr-šu-nu a-na-ku

VI
1) i-na u4-me-šú-ma i-na qa-ab-la-at
2) URU-ia Aš-šur i-ta-at
3) si-qur-ra-te šá 10 EN-ia
4) a-di KÁ.GAL ta-bi-ra
5) mu-hur-ti il-ta-ni
6)É.HI.A šu-pa-te
7) ši-di ru-qu-ti
8) qa-qa-ra-te ma-da-ti
9) eš-re-et URU-ia Aš-šur
10) lu ú-me-si
11) i-di a-sa-ma-ti
12) šá MAN.MEŠ mah-ru-ti
13) it-ti-ši-na-ma
14) ú-né-kir6
15) KI.MAH.MEŠ šá ni-še pa-na-ti
16) ina šu-bat É.HI.A ši-na-ti-ma
17) ú-né-kir6 50 SAR.MEŠ
18) zi-iq-pa mu-la-a
19) ana šu-pa-lu dan-na-su
20) ki-ṣir KUR-i lu ak-šud
21) zí-za-a-tì? šá ana URU-ia Aš-šur
22) lu ú-te-ra
23) eš-re-su ina pi-li ù SIG4
24) lu ú-bé-li-iṭ
25) na-re-e šá MAN.MEŠ mah-ru-ti
26) šá ina i-di a-sa-ma-te šá-ak-nu
27) ina áš-ri 1-en lu aš-kun
28) É ra-ba-a É MAN KUR.KUR É EZEN-at
29) pu-uh-ri DINGIR.MEŠ šu-bat MAN-ti
30) É.GAL hi-da-ti-ia ab-ni
31) e-pu-uš-ma iš-tu uš-še-šá
32) a-di gaba-dib-bi-šá ú-šek-lil
33) ù na-ri-ia aš-kun
34) ana ar-kat U4.MEŠ NUN EGIR
35) <e-nu-ma> É.GAL ši-i ú-šal-ba-ru-ma
36) e-na-hu an-hu-sa lu-diš
37) na-ri-ia Ì li-ip-šu-uš

VII
1)
ni-qa-a li-iq-qi
2) ana aš-ri-šú lu-te-er
3) Aš-šur d10 ik-ri-be-šú i-še-mu-ú
4) šá MU šaṭ-ra i-pa-ši-ṭu-ma
5) MU-šú i-šaṭ-ṭa-ru
6) na-ri-ia ú-šàm-sa-ku
7) ina aš-ri šá-ni-ma
8) a-šar la a-ma-ri
9) ú-še-ra-bu-ma i-ša-ka-nu
10) ù mìm-ma a-mat le-mu-te
11) e-ha-sa-sa-ma e-pu-šu
12) ù DINGIR.MEŠ a-ši-bu-ut
13) URU Aš-šur ina EZEN-te
14) ana ŠÀ E.GAL-lì-ia
15) ana e-re-be i-kal-lu-ú
16) ana É.GAL-lì šá-ni-ti-ma
17) i-šá-su-ú
18) É.GAL-lì ši-a-ti
19) ú-ma-šá-ru-ma i-na-du-ú
20) áš-šúm iz-zi-re-ti ši-na-ti-na
21) É.GAL šá-a-tu i-a-ba-tu-ma
22) ú-šal-pa-tu
23) ina eš-re-et É.GAL-lì-ia
24) É.GAL-la ki-ma šu-a-te-ma i-ba-nu-u
25) na!-ri-ia i-na áš-ri 1-en i-ka-ma-ru
26) ana aš-ri-šu-nu la ú-ta-ru
27) šá ana Á le-mu-te
28) ma-am-ma-na-ma u-ša-ha-zu
29) lu ana É.GAL ši-a-ti lem-né-ti
30) il-te-ne-ʾu Aš-šur d10 DINGIR.MEŠ šá AN KI
31) iš-de-šu li-su-hu
32) MAN-su liš-gi-šú
33) MU-šú NUMUN-šú ina KUR lu-hal-li-qu
34) na-ás-pu-uh UN.MEŠ-šú ha-laq KUR-šú
35) ina pi-i-šu-nu DUGUD liq-bu-ú
36) im-hul te!-še-e gaba-ra-hi
37) MUH MAN-ti-šú ki-im-ti-šú
38) li-du-ú

VIII
1)
su-um-qa bu-bu-ta ù hu-šá-ha
2) ana u4-um BALA.MEŠ-šú liš-ku-nu
3)MAN EN le-mu-ti-šú
4) gišGU.ZA-šú li-ki-im-šú
5) ana ni-iṭ-li IGI.MEŠ-šú KUR-su liš-pur
6) ia ib-ši MU-šú
7) la u-ṣa-a pir-hi-šú
8) ia e-zi-ib ana UN.MEŠ
9) MU šá ṣa-te dNIN-at te-še-e
10) ù ta-ha-zi na-ba-at-me
11) BALA.MEŠ-ia lu-šu-me
12) zi-ik-ru-su si-ni-sa-níš
13) mu!tu!-ut?˺-su ana ri-hu-ti liš-kun
14) a-na tam-ha-ri gišTUKUL-šu liš-bir
15) a-ši-ta u sah-maš-ta
16) liš-ku-un-šu
17) i-na na-ki-ri-šu
18) ia iz-zi-iz tak-li-šu
19) li-ner qu-ra-di-šu
20) lu-up-pu ana ŠUKÚR-šu
21) lu-me-li-šú
22-24) (blank)

 

 
© Copyright, The Israel Museum, Jerusalem 1995-2015